Psa 148 | DED | STEP | KEBU heiwayong memini, hallelu Yac. Kurumenga kurumenga areng kecdae, ngeni KEBU ohec memibisia nga sawau kecdae, ngeni Kebu dengerebisia.

Psalms 148

Bangec kurumeng Kebu dengerebisia

1 KEBU heiwayong memini, hallelu Yac. Kurumenga kurumenga areng kecdae, ngeniKEBU ohec memibisia nga sawau kecdae, ngeni Kebu dengerebisia. 2 Kebuac angero sasawa ngeni ye dengerebisia. Kurumennu yeac wasai areng, ngeni ye dengerebisia. 3 Wenac nga afo amma asomeng kperagiagoc, ngeni yoyomo heimibisia. 4 Kurumenga kurumenga wi yombong nga kurumenga kurumenga witinginau doku fedae, ngeniKEBU dengerebisia.

5 Yennoc yoac deu fingecgecac ngeni sasawangoKEBUAC kpac kuneng heiwayong memibisia. 6 Yeng tatacnginau seria tacgecdeac faingunuma mangina faiec, imoc naric mi ferahagecde.

7 Ngicngac bangecfu kecdae, ngeniKEBU eriendzong memibisia. Kondunggac yangtoatoa amma kondung kunenggac dzohongtoa keme kemea, ngeniKEBU dengerebisia. 8 Piratac nga nomanggbomea amma nomang maande nga nomang bangecfu fingecande amma kia firang, ngeni sasawango yeac enac tofohobisia. 9 Tiki fagang nga ic foragoc amma yomondzoc ic sasawa, 10 kateu yang nga amaac yang sasawa, gisicgbiriring nga neng kpututuckegecde.

11 Bangectoa bangecac ngictau nga ngiha ngiha nga ngictauac medacfocngina nga bangecac ngic enara kecdae, 12 sebigbori medac nga naroang momoc, ngicngac kpengeng nga nambarac, 13 ngeni sasawangoKEBUAC kpac kuneng heiwayong memibisia. Ye kpactoayagoc, imocac ye afehebesonga. Yeac kuc kibikperagiagoc kurumeng nga bangec feracyunuma wi fede. 14 Ye ngicngacfora yeneac amma ngictau mong nanggeu kuhagoc amma firang anude. Yeac ngicngacfora kpetiac kecandae, ngeni ye dengerebisia. Kebu ye Israe habufora yeac wegenacfu hama kecdae, ngeneac amma ngictau faiec.

KEBU eriendzong memibesonga, hallelu Yac.